ပပ် အီတလီ လက်ရွေးစင် အသင်းက ဘောလုံးလောကရဲ့ အအောင်မြင်ဆုံး နည်းပြ တစ်ဦး ဖြစ်တဲ့ ပပ် ဂွါဒီယိုလာကို အသင်းရဲ့ နည်းပြသစ် အဖြစ် ခန့်အပ်ဖို့ ကြိုးပမ်းခဲ့ပေမယ့် မအောင်မြင်ခဲ့ပါဘူး။ လက်ရှိမှာ ဘယ်အသင်းကိုမှ ကိုင်တွယ်နေခြင်း မရှိတဲ့ စပိန် လူမျိုး နည်းပြကြီး ကတော့ နည်းပြလောက ကနေ ၁ နှစ်တာ အနားယူဖို့သာ ဆုံးဖြတ်ထားပါတယ်။ အီတလီဟာ ကမ္ဘာ့ဖလား ပြိုင်ပွဲကို ၃ ကြိမ် ဆက်တိုက် ခြေစစ်ပွဲ မအောင်ဘဲ ထွက်ခွာခဲ့ရတဲ့ ကပ်ဘေးဆိုးကြီး အပြီးမှာ နည်းပြ ဂျန်နာရို ဂတ်တူဆိုနဲ့ လမ်းခွဲခဲ့တာပါ။
ဧပြီလအစောပိုင်းမှာ အီတလီ ဘောလုံးအဖွဲ့ချုပ် (FIGC) နဲ့ ဂတ်တူဆိုတို့ နှစ်ဦးသဘောတူ စာချုပ် ဖျက်သိမ်းခဲ့ပြီးနောက် FIGC ဟာ ဂွါဒီယိုလာကို သိမ်းသွင်းဖို့ ကြိုးစားခဲ့ပေမဲ့ အရာမထင်ခဲ့ပါဘူး။
၁ နှစ် အနားယူချင်လို့ အီတလီ အသင်းကို နည်းပြဖို့ ဂွါဒီယိုလာ ငြင်းပယ်
၂၀၁၂ ခုနှစ်တုန်း ကလည်း ဟိုဆေး မော်ရင်ညိုနဲ့ အပြိုင်အဆိုင် အားပြိုင်ရမှုတွေကြောင့် နွမ်းနယ်သွားခဲ့တဲ့ ဂွါဒီယိုလာဟာ ဘာစီလိုနာ အသင်းရဲ့ အအောင်မြင်ဆုံး ခေတ်တစ်ခေတ်ကို ပုံဖော်ပေးခဲ့ပြီးနောက် ၁ နှစ်တာ အနားယူခဲ့ဖူးပါတယ်။ အဲဒီအချိန်က စကားအတိုင်း တည်ခဲ့ပြီး ၂၀၁၃ ရာသီမှာ ဘေယန်မြူးနစ် အသင်းကို စတင်ကိုင်တွယ်ခဲ့တာပါ။
အခုလည်း မန်းစီးတီး အသင်းမှာ ၁ ဆယ်စုနှစ်ကြာ အောင်မြင်မှု များစွာ ရယူပေးခဲ့ပြီးနောက် အသက် ၅၅ နှစ် အရွယ် စပိန် နည်းပြကြီးဟာ အနားယူဖို့ ပြင်ဆင်နေပြီ ဖြစ်ပါတယ်။ “ကျွန်တော် တကယ်ကို ပင်ပန်းနေပါပြီ။ စီးရီး အလိုက် လုပ်စရာ ရှိတာတွေ အကုန်လုပ်ပေးခဲ့ပြီးပါပြီ” လို့ မန်းစီးတီးရဲ့ ၂၀၂၆-၂၇ ရာသီ နောက်ဆုံး ပွဲစဉ် အပြီးမှာ သူက ပြောကြားခဲ့ပါတယ်။
ကလပ် အသင်းတွေက သူ့ကို ချဉ်းကပ်ဖို့ မစဉ်းထားကြပေမယ့် နိုင်ငံ အသင်းတွေ ကတော့ ပွဲစဉ် နည်းပါးပြီး ဝန်ထုတ်ဝန်ပိုး နည်းပါးတာကြောင့် ဂွါဒီယိုလာကို ချက်ချင်း နည်းပြ ပြန်လုပ်ဖို့ စည်းရုံးခဲ့ကြပါတယ်။ အီတလီ အပါအဝင် နိုင်ငံ အသင်း ၄ သင်းထက် မနည်း သူ့ကို ချဉ်းကပ်ခဲ့ကြတာပါ။ ဒါပေမယ့် ESPN ရဲ့ ဖော်ပြချက်အရ အနားယူချင်နေတဲ့ ဂွါဒီယိုလာ အတွက် အီတလီရဲ့ ဆွေးနွေးမှုဟာ အစကတည်းက မဖြစ်နိုင်ခဲ့ဘူးလို့ ဆိုပါတယ်။ တခြား တစ်ဖက် မှာလည်း La Gazzetta dello Sport က ဂွါဒီယိုလာဟာ FIGC တင်ပြထားတဲ့ လစာထက် ၂ ဆအထိ ပိုမိုလိုချင်တာကြောင့် အီတလီ အသင်းကို ငြင်းပယ်ခဲ့တာလို့ သောကြာနေ့မှာ ဖော်ပြခဲ့ပါတယ်။
နောင်တစ်ချိန် မှာတော့ စပိန် နည်းပြကြီး အနေနဲ့ နိုင်ငံ အသင်း တစ်သင်းကို ကိုင်တွယ်ဖို့ စိတ်ဝင်စားလာနိုင်ပြီး အင်္ဂလန် အသင်း ကလည်း သူ့ကို ခေါ်ယူဖို့ စိတ်ဝင်စားခဲ့ဖူးပါတယ်။ ဒါပေမယ့် လက်ရှိ မှာတော့ အင်္ဂလန် ဘောလုံးအဖွဲ့ချုပ်ဟာ နည်းပြ သောမတ်စ် တူချယ် အပေါ် သစ္စာရှိရှိနဲ့ ယူရို ၂၀၂၈ အထိ အသင်းကို ဆက်လက် ကိုင်တွယ်စေဖို့ စီစဉ်ထားပါတယ်။
ဂွါဒီယိုလာ အစား တခြား ထိပ်တန်း နည်းပြတွေကို ပစ်မှတ်ထားလာတဲ့ အီတလီ
ဂွါဒီယိုလာကို ခေါ်ယူဖို့ မလွယ်ကူဘူး ဆိုတာကို အီတလီ ဘောလုံးအဖွဲ့ချုပ် ဘက်ကလည်း ကြိုတင် ရိပ်မိထားပြီးသားပါ။ ကမ္ဘာ့ဖလား ခြေစစ်ပွဲ ကျရှုံးခဲ့ပြီး နောက်ပိုင်း FIGC ဟာ အပြောင်းအလဲ များစွာ ပြုလုပ်ခဲ့ပါတယ်။ လက်ရှိ မှာတော့ FIGC က အေစီမီလန် နောက်ခံလူဟောင်းနဲ့ ဒါရိုက်တာ ဖြစ်သူ ပေါ်လို မာလ်ဒီနီကို နည်းစနစ် ဒါရိုက်တာ အဖြစ် ခန့်အပ်ထားခဲ့ပါတယ်။
မာလ်ဒီနီက ဂွါဒီယိုလာတင် မကဘဲ ကာလို အန်ဆယ်လော့တီ ကိုပါ ဆက်သွယ်ခဲ့ကြောင်း အတည်ပြုခဲ့ပါတယ်။ “ဂွါဒီယိုလာနဲ့ မဆွေးနွေးခင် ကာလို အန်ဆယ်လော့တီနဲ့လည်း ဆွေးနွေးခဲ့တာ အမှန်ပါပဲ။ ကမ္ဘာ့အကောင်းဆုံး နည်းပြတွေရဲ့ ဆန္ဒကို စတင်စုံစမ်းကြည့်တာ သဘာဝကျပါတယ်” လို့ မာလ်ဒီနီက ပြောပါတယ်။
ဂတ်တူဆိုရဲ့ နေရာမှာ အစားထိုးဖို့ အတွက် အမြန်ဆုံး ခန့်အပ်ချင်နေပေမယ့် အီတလီ အသင်း အနေနဲ့ “တကယ် လိုချင်တဲ့သူကို စောင့်ဆိုင်းသွားမယ်” လို့ မာလ်ဒီနီက ဖြည့်စွက် ပြောကြားခဲ့ပါတယ်။ အန်ဆယ်လော့တီ ကတော့ ဘရာဇီးလ် အသင်းနဲ့ ၂၀၃၀ ကမ္ဘာ့ဖလား အထိ ရှိနေတဲ့ စာချုပ်ကို လေးစားသောအားဖြင့် ဆက်လက် တာဝန် ထမ်းဆောင်သွားဖို့ စီစဉ်ထားပါတယ်။ ဒါကြောင့် အီတလီ အသင်း အနေနဲ့ အန်ဒရီယာ ပီယာလိုကို နည်းပြ အဖြစ် ခန့်အပ်နိုင်သလို နာပိုလီ အသင်း ကနေ ထွက်ခွာပြီးနောက် အလုပ်လက်မဲ့ ဖြစ်နေတဲ့ အန်တိုနီယို ကွန်တီ ကိုလည်း ပစ်မှတ်ထားလျက် ရှိပါတယ်။
●●●
နောက်ထပ်သတင်းများအတွက် ကျွနိုပ်တို့ ဘလော့အား ဝင်ကြည့်ပါ ဘောလုံး STORIES & ODDS
အားကစားနှင့် လောင်းကစား နောက်ဆုံးသတင်းများအား အမြဲသိရှိနေမည်
ဆိုရှယ်မီဒီယာတွင် ကျွနိုပ်တို့အား followမည် ဖေစ့်ဘုတ် , X and အင်စတာဂရမ်
