အာဆင်နယ်က ဟူလီယန် အဲလ်ဗာရက်ဇ်ကို အမှန်တကယ်ပဲ ခေါ်ယူနိုင်မှာလား၊ ဒါမှမဟုတ် ဟန်ပြသက်သက်ပဲလား။ | ပရီးမီးယားလိဂ်

ပရီးမီးယားလိဂ် ချန်ပီယံ အာဆင်နယ်ဟာ အက်တလက်တီကိုမက်ဒရစ် တိုက်စစ်မှူး ဟူလီယန် အဲလ်ဗာရက်ဇ်နဲ့ သတင်းတွေ ထွက်နေတာ တော်တော်လေး ကြာနေပါပြီ။ လက်ရှိ မှာတော့ ဒီအပြောင်းအရွှေ့ ဇာတ်လမ်းမှာ ဘာစီလိုနာ အသင်းက အဓိက ရေပန်းအစားဆုံး ဖြစ်နေပေမယ့်၊ အာဆင်နယ် ကတော့ အခွင့်ကောင်းကို အရိပ်တကြည့်ကြည့် စောင့်ရင်း နောက်ကွယ်ကနေ မျက်ခြေမပြတ် လိုက်လံ စောင့်ကြည့်နေဆဲ ဖြစ်ပါတယ်။ 

Sky Sports Italy ရဲ့ ဖော်ပြချက်အရ ပရီးမီးယားလိဂ် ချန်ပီယံ တို့ဟာ အဲလ်ဗာရက်ဇ်ကို မြောက်လန်ဒန်ဆီ ခေါ်ယူဖို့ အတွက် အက်တလက်တီကိုနဲ့ အကြိုဆွေးနွေးမှုတွေ ပြုလုပ်ခဲ့တယ်လို့ သိရပါတယ်။ တရားဝင် ကမ်းလှမ်း ဆွေးနွေးမှုမျိုး အထိ မရောက်သေးပေမယ့် ကလပ် နှစ်ခု အကြား ဆက်သွယ်ရေး လမ်းကြောင်း ကတော့ ပွင့်နေဆဲ ဖြစ်ပါတယ်။

အဲလ်ဗာရက်ဇ် ကိုယ်တိုင် ကတော့ ဘာစီလိုနာဟာ သူ့ရဲ့ “ အိမ်မက်ကလပ်” ဖြစ်တယ်လို့ အရိပ်အမြွက် ပြောကြားထားသလို၊ ဒီနွေရာသီမှာ အက်တလက်တီကို ကနေ ထွက်ခွာခွင့် ရဖို့ ကမ္ဘာ့ဖလား ပြိုင်ပွဲ အတွင်းမှာ လူသိရှင်ကြား ထုတ်ဖော်ပြောဆိုထားပါတယ်။ ဒါပေမယ့်လည်း အာဆင်နယ် ကတော့ စိတ်ရှည်လက်ရှည်နဲ့ အခြေအနေကို စောင့်ကြည့်နေပြီး အပြောင်းအလဲတစ်ခုခု ဖြစ်လာရင် သူတို့ ဘက်က အခွင့်ကောင်းယူနိုင်ဖို့ ပြင်ဆင်ထားတာပါ။

 

အာဆင်နယ် အနေနဲ့ အဲလ်ဗာရက်ဇ်ကို တကယ် ခေါ်ယူနိုင်မလား

အဲလ်ဗာရက်ဇ်သာ အက်တလက်တီကို ကနေ ထွက်ဖြစ်ခဲ့ရင် ဘာစီလိုနာက ခေါ်ယူဖို့ အလားအလာ အရှိဆုံး ဖြစ်နေဆဲပါ။ ဒါပေမယ့် ဒါဟာ ရာနှုန်းပြည့် သေချာတယ်လို့တော့ ပြောလို့ မရသေးပါဘူး။ ဘာဖြစ်လို့လဲ ဆိုတော့ အက်တလက်တီကိုဟာ သူတို့ရဲ့ ကစားသမားကို ဘာစီလိုနာဆီ မရောင်းချင်ပါဘူး။ သူတို့ဟာ ဘာစီလိုနာရဲ့ ပထမအကြိမ် ကမ်းလှမ်းမှုကို ပယ်ချခဲ့ရုံတင်မကဘဲ လူမှုကွန်ရက်ပေါ်မှာ ဘာဆာကို တိုက်ခိုက်တာတွေ၊ လာလီဂါ ချန်ပီယံ ဘာဆာကို ဥပဒေအရ တိုင်ကြားတာတွေ အထိ ပြုလုပ်ခဲ့ပါတယ်။ ဒါကြောင့် အဲလ်ဗာရက်ဇ် ဘာဆာကို ပြောင်းရွှေ့သွားမှာက အက်တလက်တီကို အတွက်တော့ အဆိုးရွားဆုံး ရလဒ်ပါပဲ။

ဒီလို အခြေအနေမျိုးမှာ အက်တလက်တီကို ဘက်က ကစားသမားရဲ့ တောင်းဆိုမှုကို လိုက်လျောပြီး ရောင်းချရတော့မယ် ဆိုရင် စပိန် ပြင်ပက ကလပ် အသင်း တစ်သင်းဆီ ရောင်းချဖို့ ပိုပြီး လမ်းဖွင့်ပေးထားနိုင်ပါတယ်။ အဲ့ဒီနေရာမှာ အာဆင်နယ် ဝင်လာတာပါ။ လက်ရှိ အာဆင်နယ်ရဲ့ အားကစား ဒါရိုက်တာ အန်ဒရီယာ ဘာတာဟာ အရင်က အက်တလက်တီကိုမက်ဒရစ်မှာ ဒီရာထူးနဲ့ပဲ အလုပ်လုပ်ခဲ့ဖူးသူ ဖြစ်ပါတယ်။ ၂၀၂၄ နွေရာသီမှာ အဲလ်ဗာရက်ဇ် တစ်ယောက် မန်စီးတီး ကနေ ဒီယေဂို ဆီမြွန်နီရဲ့ အက်တလက်တီကိုဆီ ပြောင်းရွှေ့လာစဉ်က ဘာတာဟာ မက်ဒရစ်မှာ ရှိနေဆဲ ဖြစ်ပါတယ်။ ဒီအချက်က ကလပ် နှစ်ခု အကြား ဆွေးနွေးမှုကို ပိုမို အထောက်အကူပြုစေနိုင်ပါတယ်။

ဘာစီလိုနာ ဥက္ကဋ္ဌ ယိုအန် လာပေါ်တာ ကတော့ သူတို့ရဲ့ ပထမကမ်းလှမ်းချက်ဟာ အကြုံးဝင်နေဆဲ ဖြစ်ပြီး ကမ္ဘာ့ဖလား အပြီးမှာ ပိုမိုကောင်းမွန်တဲ့ ကမ်းလှမ်းမှုတစ်ခု ထပ်လုပ်နိုင်တယ်လို့ ဆိုပါတယ်။ ဒါပေမယ့် ဘာဆာရဲ့ စိတ်ရှည်မှု ကလည်း အကန့်အသတ် ရှိနေတာကြောင့် သူတို့သာ လက်လျှော့သွားခဲ့ရင် အာဆင်နယ်ဟာ အဲလ်ဗာရက်ဇ်ကို ခေါ်ယူနိုင်မယ့် ရေပန်းအစားဆုံး ကလပ် ဖြစ်လာမှာပါ။

 

အာဆင်နယ်ရဲ့ အပြောင်းအရွှေ့ ရည်မှန်းချက် ကြီးမားမှု

အဲလ်ဗာရက်ဇ်ကို တကယ် ခေါ်ယူနိုင်မလား ဆိုတာ မသေချာသေးပေမယ့် တစ်ခု ကတော့ ရှင်းပါတယ်။ နှစ်ပေါင်း ၂၀ ကျော် အတွင်း ပထမဆုံးအကြိမ် ပရီးမီးယားလိဂ် ဖလားကို ရယူနိုင်ခဲ့တဲ့ အာဆင်နယ်ဟာ ဒီနွေရာသီမှာ နာမည်ကြီး ကစားသမား တစ်ယောက်ကို ငွေပုံအောပြီး ခေါ်ယူဖို့ အဆင်သင့် ဖြစ်နေပြီဆိုတဲ့ အချက်ပါပဲ။

လောလောဆယ် အပြောင်းအရွှေ့ ဈေးကွက်မှာ အာဆင်နယ်ဟာ ပီယာရို ဟင်ကပ်ပီယေနဲ့ အရန် ဂိုးသမား အီလန် မီလေယာတို့ နှစ်ဦးတည်း ကိုပဲ ခေါ်ယူထားနိုင်ပါသေးတယ်။ ဘယ်လ်ဂျီယံ တိုက်စစ်မှူး ထရော့ဆက်ဒ် ဘက်ဆစ်တပ်စ်ကို အပြီးသတ် ပြောင်းရွှေ့သွားပြီးနောက် ကလပ် ဘရုဂေးက တောင်ပံကစားသမား ခရစ္စတို ဇိုးလစ်ကို အစားထိုးဖို့ နီးစပ်နေပါတယ်။

ဒီအပြောင်းအရွှေ့တွေက ကောင်းမွန်တဲ့ ခေါ်ယူမှုတွေ ဖြစ်ပေမယ့် ကမ္ဘာ့အဆင့် ထိပ်တန်း ခေါ်ယူမှုမျိုးတော့ မဟုတ်သေးပါဘူး။ နယူးကာဆယ်က ဘရူနို ဂီမာရေးစ်ကို ခေါ်ယူမယ့် ကိစ္စ ကလည်း တန့်နေသလို၊ မော်ဂန် ရော်ဂျာစ် ဒါမှမဟုတ် ဘရတ်ဒ်လေ ဘာကိုလာတို့ အပေါ် စိတ်ဝင်စားမှု သတင်းတွေ ကလည်း ထပ်မံ ထွက်ပေါ်လာခြင်း မရှိတော့ပါဘူး။ 

ဖြစ်နိုင်တာ ကတော့ အာဆင်နယ်ဟာ အဲလ်ဗာရက်ဇ်ရဲ့ အပြောင်းအရွှေ့ ဇာတ်လမ်း အဆုံးသတ်ကို စောင့်ဆိုင်းနေတာ ဖြစ်နိုင်ပါတယ်။ ဒါပေမယ့် လက်ရှိ ချန်ပီယံ အာဆင်နယ် အနေနဲ့ အဲလ်ဗာရက်ဇ် အပါအဝင် ထိပ်တန်း ကြယ်ပွင့်တွေနဲ့ သတင်းထွက်နေခြင်းကတင် သူတို့ရဲ့ ဆုဖလားကို ကာကွယ်ဖို့ အတွက် ငွေကြေးအမြောက်အမြား အသုံးပြုဖို့ အဆင်သင့်ရှိနေကြောင်း ပြသရာ ရောက်နေပါတယ်။

ပြီးခဲ့တဲ့ နွေရာသီက ယူရို သန်း ၄၀၀ နီးပါး အသုံးပြုခဲ့တဲ့ အာဆင်နယ်ရဲ့ ဘဏ္ဍာရေး အင်အားက လက်ရှိ အချိန်ထိ တောင့်တင်းနေဆဲ ဖြစ်ပါတယ်။ ဒီနှစ်မှာ မနှစ်ကလောက် မသုံးရင်တောင် ကမ္ဘာ့အဆင့်မီ ကစားသမား တစ်ဦး အတွက် ငွေအမြောက်အမြား သုံးစွဲဖို့ ရှိနေတာ ကတော့ သေချာသလောက်ပါပဲ။ အဲ့ဒီကစားသမားဟာ အဲလ်ဗာရက်ဇ် ဖြစ်မလား၊ ဒါမှမဟုတ် တခြား တိုက်စစ်မှူး တစ်ဦး ဖြစ်မလား ဆိုတာကတော့ စိတ်ဝင်တစား စောင့်ကြည့်ရမှာ ဖြစ်ပါတယ်။

   

●●●

နောက်ထပ်သတင်းများအတွက် ကျွနိုပ်တို့ ဘလော့အား ဝင်ကြည့်ပါ ဘောလုံး STORIES & ODDS

အားကစားနှင့် လောင်းကစား နောက်ဆုံးသတင်းများအား အမြဲသိရှိနေမည်

ဆိုရှယ်မီဒီယာတွင် ကျွနိုပ်တို့အား followမည် ဖေစ့်ဘုတ် , X and အင်စတာဂရမ်