အက်တလက်တီကိုမက်ဒရစ် ကတော့ ချန်ပီယံလိဂ် ကနေ ထွက်ခွာခဲ့ရသလို စနေနေ့က ကစားခဲ့တဲ့ လာလီဂါ ပွဲစဉ်မှာ ဆဲလ်တာဗီဂိုကို ၁-၀ ရလဒ်နဲ့ ထပ်မံ အရေးနိမ့်ခဲ့ပါတယ်။ အက်တလက်တီကို နည်းပြ ဒီယေဂို ဆီမြွန်နီ ကတော့ ဆဲလ်တာဗီဂိုနဲ့ ပွဲမှာ ထပ်မံ ရှုံးနိမ့်ပြီး အသင်းရဲ့ ရလဒ်ပိုင်း ဆိုးရွားမှုတွေ ဆက်တိုက် ကြုံတွေ့နေရပေမယ့်လည်း သူတို့ အနေနဲ့ ဒီ “ အခြေအနေဆိုးကို အကောင်းဆုံး ထိန်းကျောင်း ကျော်ဖြတ်သွားမယ်” လို့ အခိုင်အမာ ပြောကြားခဲ့ပါတယ်။
ပြီးခဲ့တဲ့ အင်္ဂါနေ့က ချန်ပီယံလိဂ် ဆီမီးဖိုင်နယ် ဒုတိယအကျော့ ပွဲစဉ်မှာ အာဆင်နယ်ကို ရှုံးနိမ့်ပြီး ပြိုင်ပွဲ ကနေ ထွက်ခွာခဲ့ရပြီးနောက်၊ အက်လက်တီဟာ သူတို့ရဲ့ အိမ်ကွင်း မက်ထရိုပိုလီတာနိုမှာ ဆဲလ်တာဗီဂိုကို ၁-၀ ရလဒ်နဲ့ ထပ်မံ အရှုံးပေးခဲ့ရတာ ဖြစ်ပါတယ်။
ဒီပွဲမှာ အက်တလက်တီကိုဟာ မျှော်မှန်းဂိုး (xG) ၂.၀၄ အထိ ရှိခဲ့ပြီး ပြိုင်ဘက် ဆဲလ်တာဗီဂို ကတော့ ၀.၁၃ သာ ရှိခဲ့ပါတယ်။ ဒါပေမယ့် အက်တလက်တီကိုတို့ ရရှိတဲ့ ဂိုးသွင်းခွင့်တွေကို အသုံးမချနိုင်ခဲ့ဘဲ အဒမ်မိုလာ လွတ်ခ်မန်းရဲ့ ကန်ချက် ဂိုးတိုင်ထိထွက်ခဲ့ရသလို၊ ဆဲလ်တာဗီဂို ကတော့ သူတို့ တစ်ပွဲလုံး ရရှိခဲ့တဲ့ တစ်ကြိမ်တည်းသော ဂိုးပေါက်တည့် ကန်ချက် ကနေ တိုက်စစ်မှူး ဘိုဂျာ အီဂလီစီးယပ်စ်က အနိုင်ဂိုး သွင်းယူပေးသွားခဲ့တာ ဖြစ်ပါတယ်။
ဒါဟာ အက်တလက်တီ အတွက် လာလီဂါ နောက်ဆုံး ၁၅ ပွဲအတွင်း ဆဲလ်တာဗီဂိုကို ပထမဆုံး အကြိမ်အဖြစ် ပြန်လည် ရှုံးနိမ့်ခဲ့ခြင်း ဖြစ်ပါတယ်။ ဒီ ရှုံးပွဲက သူတို့ရဲ့ သမိုင်းတစ်လျှောက် ဆဲလ်တာဗီဂို အပေါ် ရှုံးပွဲ မရှိဘဲ အကြာဆုံး စံချိန်တင်ထားမှုကိုလည်း ရပ်တန့်စေခဲ့ပါတယ်။ ၂၀၂၅ ခုနှစ် ကလပ် ကမ္ဘာ့ဖလား ပြိုင်ပွဲ အပါအဝင် ဆိုရင် ဆီမြွန်နီရဲ့ အသင်းဟာ ယခုရာသီ ပြိုင်ပွဲစုံ ၆၁ ပွဲ ကစားခဲ့ရာမှာ ၁၉ ပွဲ အထိ ရှုံးနိမ့်ထားခဲ့ပြီ ဖြစ်ပါတယ်။ ဒါဟာ အက်တလက်တီကို အတွက် ၂၁ ရာစု အတွင်း တစ်ရာသီ အတွင်း ရှုံးပွဲ အများဆုံး မှတ်တမ်းတွေထဲက ဒုတိယ အဆိုးရွားဆုံး မှတ်တမ်း ဖြစ်လာခဲ့ပြီး၊ ၂၀၀၉-၁၀ ရာသီက ၂၄ ပွဲ ရှုံးနိမ့်ခဲ့တဲ့ စံချိန်ဆိုးရဲ့ နောက်ပိုင်းမှာ အဆိုးဆုံး ဖြစ်လာခဲ့တာပါ။
အက်တလက်တီကိုဟာ ပြီးခဲ့တဲ့လက ကစားခဲ့တဲ့ ကိုပါဒယ်ရေး ဗိုလ်လုပွဲ မှာလည်း ရီးရဲလ်ဆိုစီဒက်ကို ပင်နယ်တီ အဆုံးအဖြတ်နဲ့ ရှုံးနိမ့်ခဲ့ရပါတယ်။ အကယ်၍ ဒီနေ့ ဆဲလ်တာဗီဂိုနဲ့ ပွဲမှာသာ အနိုင်ရရှိခဲ့မယ် ဆိုရင် လာမယ့်ရာသီ ချန်ပီယံလိဂ် ဝင်ခွင့်ကို ရာနှုန်းပြည့် သေချာအောင် လုပ်ဆောင်နိုင်မှာ ဖြစ်ပါတယ်။
ပွဲအပြီးမှာ နည်းပြ ဆီမြွန်နီက အခုလို ပြောကြားခဲ့ပါတယ်။ “လက်ရှိအချိန်မှာ ကျွန်တော်တို့ ဒီအခြေအနေကို ကောင်းကောင်း ထိန်းကျောင်း ကျော်ဖြတ်ဖို့ လိုအပ်ပါတယ်။ ကျွန်တော်တို့ ကစားသမားတွေဟာ လာလီဂါ ပြိုင်ပွဲမှာ အရေးပါတဲ့ အခန်းကဏ္ဍ ကနေ ပါဝင်ပေးခဲ့ကြပြီး ချန်ပီယံလိဂ် ဝင်ခွင့် ရရှိရေးဆိုတဲ့ ကလပ်ရဲ့ ပန်းတိုင်ကို အကောင်အထည်ဖော် ပေးနိုင်ခဲ့ကြပါတယ်။”
“ဒါ့အပြင် ဒီရာသီ ဥရောပ ချန်ပီယံလိဂ် ပြိုင်ပွဲ မှာလည်း ကျွန်တော်တို့ မျှော်လင့်ထားတာထက် ပိုကောင်းအောင် ကစားနိုင်ခဲ့ကြပါတယ်။ ကိုပါဒယ်ရေး ပြိုင်ပွဲ မှာလည်း ပင်နယ်တီနဲ့ ရှုံးပြီး ထွက်ခဲ့ရတဲ့ အထိ ကျွန်တော်တို့ လုပ်နိုင်သလောက် အဝေးဆုံးအထိ တိုက်ပွဲဝင်ခဲ့ကြပါတယ်။ သူတို့ကို ကျွန်တော် ဘာမှ ထပ်ပြီး ပြောနေဖို့ မလိုပါဘူး။ ကျွန်တော်တို့ ဒီအခြေအနေကို ကောင်းကောင်း ထိန်းသိမ်းပြီး ရာသီကို အားကောင်းကောင်းနဲ့ အဆုံးသတ်နိုင်ဖို့ပဲ လိုပါတယ်။ သူတို့နဲ့ စကားပြောမယ်၊ သူတို့ရဲ့ ကြိုးစား အားထုတ်မှုတွေ အတွက် ကျေးဇူးတင်စကား ပြောမယ်၊ ဒါပါပဲ။ ဒါက တခြား မတူညီတဲ့ ခက်ခဲတဲ့ အခိုက်အတန့်တွေကို ကျွန်တော်တို့ ကျော်ဖြတ်ခဲ့ကြသလိုမျိုးပဲ၊ လက်ရှိ အခြေအနေကို အကောင်းဆုံး ထိန်းကျောင်း ဖြတ်သန်းရမယ့် ကိစ္စရပ် တစ်ခုပါပဲ” လို့ ဆိုခဲ့ပါတယ်။
အက်တလက်တီကိုမက်ဒရစ်ဟာ လာမယ့် မေလ ၁၂ ရက်နေ့ လာလီဂါမှာ အိုဆာဆူနာနဲ့ ရင်ဆိုင်ရမှာ ဖြစ်ပါတယ်။ အဲဒီနောက် လာမယ့်တစ်ပတ် ပိတ်ရက် မှာတော့ ယခုရာသီရဲ့ နောက်ဆုံး အိမ်ကွင်း ပွဲစဉ် အဖြစ် ဂီရိုနာကို ဧည့်ခံကစားရဖို့ ရှိနေပါတယ်။
●●●
နောက်ထပ်သတင်းများအတွက် ကျွနိုပ်တို့ ဘလော့အား ဝင်ကြည့်ပါ ဘောလုံး STORIES & ODDS
အားကစားနှင့် လောင်းကစား နောက်ဆုံးသတင်းများအား အမြဲသိရှိနေမည်
ဆိုရှယ်မီဒီယာတွင် ကျွနိုပ်တို့အား followမည် ဖေစ့်ဘုတ် , X and အင်စတာဂရမ်
